ایستر صنما چیخ چمنه بیر گوللره بیر باخ

لاله دئمیرم اولسادا ریحان اولا بیلمز

یا چیخ چوله سیر ائیله داغی باغی آمانی

داغ داشدادا سن تک ده لی جئیران اولا بیلمز

بو حوسنی صلاحت کی سنه تانری وریبدیر

اولمیا ملک سن بئله اینسان اولا بیلمز

بیل قدرینی بئش گوندیر گولین عؤمرو چمنده

داییم بو طراوتده گولیستان اولا بیلمز

هیجران گئجه سی زؤلفینه بنزر نه اوزوندو

امر ائت صؤبح اولا اولمایا خرمان اولا بیلمز

لطف ائیله مکرم قیل قوی اوپوم گول یاناغیننان

من خسته یه بونان بویوک احسان اولا بیلمز

ساقی دولانیم باشووا وئر باده ی پیاپی

سرمست ائیله دایم بئله دوران اولا بیلمز

طعن ائیله زاهید منه بو عشقیده باری

عاشیق کی ره عشقیده پئشمان اولا بیلمز

من ایسته میرم جننتی قیل بنده نی معذور

جننده بئله حوری و غلمان اولا بیلمز

صرف ائیلیدی داود غزل یازماقا عؤمرین

مین ایلده یازا مرغ غزل خوان اولا بیلمز

(شعری از  داود آریانی بستان آباد)