ئولوم حقدندیر،امما نوجوان ئولمک نه موشکولدور
گؤزونده هر مورادی،تازه- جان ئولمک نه موشکولدور
***
هوای- عشق سرده، خاطیرینده وصل سئوداسی
دیلینده ازبری- یار و جینان ئولمک نه موشکولدور
***
تماشای جمالیندان نظرلر اولمایا خالی
نیظامی- خطّ و خالی خوشنیشان ئولمک نه موشکولدور
***
کلامی،نیطقی،لفظی خوش،دیلی شیرین،أوزو خندان
قیامی- قامتی سروی- روان ئولمک نه موشکولدور
***
چئکه حسرت گؤرنلر،گؤرمئیه نلر آرزوسوندا
اولا دیللرده وفی هر زمان ، ئولمک نه موشکولدور
***
کئچیب پیکان باغریندان،دوشوب مجروح سرگشته
اولا آل قانینا غلطان ئولمک نه موشکولدور
***
وئره غوربتده جان،یانیندا یار و همدمیندن یوخ
قالا کؤنلونده هر سیرری نیهان،ئولمک نه موشکولدور
***
تکللومدن دوشوب دیل،تاب و طاقت قالماییب جاندا
گؤزو یوللاردا قالیب بی زبان ئولمک نه موشکولدور
***
تمام اولماز یوز ایل شرح ایلئه سم بو دردی- بی درمان
غریب و بی کس وبی خانیمان ئولمک نه موشکولدور
***
نئجه نورس جوانی – سرفرازیندان جودا،حسرت
ویدادی،خسته دوشمک،ناتوان ئولمک نه موشکولدور

خسته ویدادی