کؤنلوم دولبدی غملن،پوزغون خزانه بنزه ر
دوز قامتیم بوکولموش سانکی کمانه بنزه ر
---
آختارمیشام وفانی،سانکی وفا سؤز اولموش
گزدیم گول ایچره آمما گوللر تیکانه بنزه ر
---
غملن دولاندا قلبیم،دردیم چکن قلم دیر
قان کلمه لر یازاندا،آتش فشانه بنزه ر
---
ایچدیم خومار گؤزوندن شوریده لیک شرابین
کیپریک لرین اوخ اولموش،سینه م نشانه بنزه ر
---
من بیر سینیق سفینه،عشقین منی دیریلتدی
هجرینده آغلار اولدوم،گؤزلرده،قانه بنزه ر
---
دؤنمز «رسولی»اصلا وورغونلوغون یولوندا
عاشق لره فراقین،بیر امتحانه بنزه ر
---
رسولی